Антывізавы маніфест

За бязвізавую Беларусь!

Шаноўныя суграмадзяне Літвы, Беларусі, Еўропы і свету!  

Заклікаем вас падтрымаць ідэю ўвядзення бязвізавага рэжыму для грамадзян суседкі Еўразвязу – Рэспублікі Беларусь – у Шэнгенскую зону і наадварот. 

Менавіта дасягненне гэтай амбіцыйнай мэты павінна служыць сапраўдным паказчыкам поспеху праграмы “Усходняга партнёрства” – а не колькасць афіцыйных дэкларацыяў і візітаў, праведзеных форумаў, рэалізаваных праектаў ды засвоеных сродкаў. 

Як прадстаўнікі грамадзянскай супольнасці сваёй краіны, Еўропы і свету, за непрымальны перажытак лічым у ХХІ ст. візавым дротам адмяжоўвацца ад сваіх суседзяў – мірных і адукаваных людзей, якія нікому не нясуць небяспекі. Нежаданне правадыроў і недасведчанасць простых грамадзян у пабудове сучаснай еўрапейскай дэмакратыі – не падстава караць усю краіну.  

Наадварот – мы перакананыя, што менавіта візавы бар’ер і закрытасць беларускай сістэмы – гэта асноўныя перадумовы кансервацыі цяперашняга стану, які не задавальняе ні беларускае грамадства, ні ЕЗ.  

Размовы пра развіццё супрацоўніцтва ў галіне бізнесу, культуры, міжчалавечых кантактаў і грамадзянскай супольнасці так і застануцца размовамі датуль, пакуль элементарная паездка ў госці альбо са справамі будзе патрабаваць папярэдняга праходжання доўгіх і бязглуздых працэдур і/або саліднай сумы грошай (60 еўра для беларусаў – гэта значная частка месяцовага заробку).  

Заклікаем кіраўнікоў Беларусі і Літвы як мага хутчэй дамовіцца аб бязвізавым рэжыме для жыхароў памежжа, які абяцаецца не першы год, а на ўзроўні ЕЗ – аб зніжэнні кошту візаў і спрашчэння бюракратычных фармальнасцяў. У больш аддаленай перспектыве лічым неабходным імкнуцца да поўнага скасавання візавага рэжыму. 

З боку ЕЗ, які заслужана ганарыцца сваёй “мяккай сілай”, прыцягальнай для насельнікаў суседніх краёў – неразумна і недальнабачна сячы галіну, на якой гэтая мяккая сіла грунтуецца.  

Што можа быць больш разбуральным для прывабнага іміджу вольнай аб’яднанай Еўропы, чым твар консульскага працаўніка за шыбай амбасады? Ён раздражнёны і стомлены – бо замест таго, каб годна прадстаўляць сваю дзяржаву, даводзіцца цэлымі днямі выконваць бессэнсоўную тэхнічна-папяровую працу.  

Дзяржаўныя межы былі і будуць, але наша мэта – не дапусціць з’яўлення новай жалезнай, “папяровай” або любой інакшай заслоны.  

Межы не павінны станавіцца непераадольнай перашкодай для нашых ідэяў, мараў і памкненняў! 

Просім усіх неабыякавых злучыць намаганні і выразіць падтрымку шляхам падпісання гэтага маніфесту.

Арганізацыя „Belarus Watch“, Вільня, Літва